مساء الخيرات :)
نبدأ بقي ان شاء الله بالنصايح، بس قبل ما نبدأ احب أنوه على حاجة (حلوة أنوه دي ههههههههه)
النصايح والوصفات والمعلومات اللي في مدونتي موجهة في الاساس للاشخاص الاصحاء، يعني اللى مش بيعانوا من أي امراض مزمنة او مشاكل صحية لا قدر الله
لو انتى بتعاني من مرض مزمن، او أى مشاكل صحية، أو حامل أو بترضعي طفلك الجميل طبيعاً، يبقي لازم لازم لازم تستشيري الطبيب، اوعي تعملي اي حاجة من نفسك، لأن في الحالات دي احتياجات جسمك بتبقي غير احتياجات أي شخص عادي، اوكيه؟ اتفقنا؟ وعد؟
نبدأ باسم الله ...
النصيحة الأولي:
عودي نفسك انك تصحي بدري نص ساعة زيادة بس، ده هيخليكي نشيطة ومش مضغوطة باقي اليوم، لانك هتحصلي على وقت خاص بيكي قبل ما باقي افراد الاسرة يصحوا ويبدأ يومك المشحون! وفي الوقت ده اعملي أي حاجة بتحبيها: صلي، اسمعي موسيقى، اقرأي كتاب أو جريدة أو مجلة، ارسمي، اخبزي ...........زي ما تحبي :)
النصيحة الثانية:
ابدأي يومك بشرب كوب ماء دافئ عليه عصير ليمون (كتري او قللي حسب تفضيلك الشخصي) وملعقة صغيرة عسل نحل.
النصيحة الثالثة:
اكثري من شرب الماء (في درجة حرارة الغرفة، بلاش الماء البارد زيادة عن اللزوم أو المثلج): حوالي 8 اكواب كبيرة يومياً.
النصيحة الرابعة:
لو جوعتي في نص النهار، بلاش الحلويات المغلفة والفاست فوود (الوجبات السريعة)، جربي شرب كوب مياه، وبعدين استني ربع ساعة، لو لسه جعانه احسن حاجة الفاكهة (ممكن دايما تحطي تفاحة في شنطتك قبل ما تنزلي الصبح) أو ممكن تعملي زي ما بعمل: بادخل اي محل فكهاني يقابلني او سوبرماركت وانقي كام واحدة يوسفي او موزتين واخليه يوزنهم، وآكلهم وانا ماشية، عاااادي جدا :) (بس امسحي القشرة الاول بمنديل مبلل بمطهر، او لو متوفر مياه جارية اغسليهم)
ممكن برضو تاخدي مكعبين شيكولاتة غامقة (60% او اكثر من الكاكاو).
النصيحة الخامسة:
تناولي كل يوم حفنة من المكسرات (في حجم قبضة اليد)، انا شخصياً عملت اكياس صغيرة محكمة الغلق من المكسرات المشكلة (أى نوع موجود عندك، ان شاء الله حتى فول سوداني)، واحتفظي بواحد دايماً في شنطتك.
وللحديث بقية ان شاء الله
