تقديم لابد منه

مساء الخيرات على احلى بنات وسيدات :)

طبعاً زي ما قولتلكم انا في الأساس عملت المدونة دي عشان أشاركم بعض النصائح اللي افادتني اثناء رحلة الكفاح مع الكيلوجرامات الزيادة اللي كانت مصرة ومصممة انها ما تفارقنيش، عشرة بقي :)

انا طبعاً عارفة ان النت فيه (ما شاء الله يعني، اللهم لا حسد) ملايين المواضيع عن الصحة والرشاقة والاكل المتوازن والريجيم ووو.....

بس انا بجد حاسة بكل واحدة فيكم بتحاول تخسر الوزن الزيادة، او على الاقل بتحاول تحافظ على وزنها وما تزيدش عنه، علشان كده هشاركم كام نصيحة كدة (على ما قُسم) ساعدتني انا شخصياً على تقليل وزني.

بس اولاً: لازم كل واحدة تعرف حاجتين اساسيتين: اني مش هاديكو نصايح سريعة، يعني على رأي اصدقائنا الامريكان "ما عنديش shortcuts" (طرق مختصرة يعني)، لازم الواحد يبذل مجهود معقول (مش قصدي مجهود جسماني لا سمح الله ههههههه) والتزام؛ ثانياً، ان شاء الله النصايح دي هتكون واقعية ومنطقية وعقلانية جدا جدا جدا (وكمان مش مكلفة)، لاني عارفة -خلينا نكون صرحاء مع بعض- الحياة دلوقت كلها مشغولة ومشحونة وسريعة جداً.

اه، نسيت اقول كمان ان كل المجهود اللي بعمله هو اني اجمع اكبر قدر ممكن من المعلومات والنصايح من اماكن مختلفة، بحيث اننا كسيدات عربيات مشغولات نقدر نطبقها ونواظب عليها، مع الاعتراف بجميع الحقوق الادبية لاصحابها :).

ما اطولش عليكم بقى.

دمتم في رعاية الله :)